pulasthi returns!

චන්දෙදි පැරදුන පැත්තට සපෝට් එක දුන්න නිසා පුලා පහුගිය ටිකේ හිටියේ මුඛයයි අධෝමුඛයයි ගෙදරයි කාමරේ දොරයි සේරම වහගෙන ඔලුවත් වහගෙන රෙද්දක් පොරෝගෙන හිතේ බයෙන්.
මා වැනි බිලින්දා - මරුවා යයිද කැන්දා සීන් එකක් වෙයි කියල පුලස්තිට හිතුනෙ චන්ද කැම්පේන් එක චන්ද කැම්පේන් එකක් නොවී මාර යුද්දයක සයිස් එකට අන්තිම දවස් කීපයේදී පත් උන හින්ද.සරත් බොස් හිටපු හෝටලේ වටකරල මොකක්දෝ කෙලියක් කලා කියල ආරංචි වුනාට අපරාදෙ කියන්න බැහැ අපි වගේ නෝමල් පොරවල් වලට නං කියන්න තරම් කරදරයක් වුනේ නැහැ ඔන්න.කරදරයක් නොකරන බව දැනං උන්න නං පාරට බැහැල ආතල් එකේ කිරිබත් කෑල්ලක් ගිලින්න තිබුන නේද කියල හිතල පුලාගෙ හිත විස්සෝප වුනා.
ප්‍රභාට කෙල වුනාමත් අපි කිරිබත් කනවා.
ප්‍රභාට කෙලවපු එකාට කෙලවුනාමත් අපි කිරිබත් කනවා.
ලුනු මිරිස් එක්ක කිරිබත් හරි රහයි නේද?
ස්වාධීන මැතිවරන කොමිසොම් නොතිබ්බට සාමකාමී විදිහට චන්දෙ කොරල අපේ මහරජතුමා අපිට හොද ආදර්සයක් දීල තියෙනවා.

මේ ගැන හිතල සන්තෝසෙන් ඉන්න කොට පුලාගේ බොක්ක මුරා ඇවිත් එක එක කුනු කතා කියන්න ගත්තා.
- ෆොන්සේකා බොස් ආරක්සක කටයුතු ගැන සංවේදී දේවල් හෙලි කල නිසා අත් අඩංගුවට ගන්න යනවලු -
- ෆොන්සේකා බොස්ගෙ ආරක්සක බටයො සෙට් එකක් හිරේට අරගෙන පාර මැද දන ගස්සලා තිබ්බලු -
- ලංකා ඊ නිව්ස් එකේ මාධ්‍යවේදි උන්නැහෙ කෙනෙක් ආ ගිය අතක් නැතිලු -
- ලංකා ඉරිදා එකේ කර්තෘ මහත්තයා හිරේලු -
- සුසිල් අධ්‍යාපන තුමාගෙන් බැසිල් ගැන අහපු විදේස මාධ්‍යවේදිනිට සියරටට නොමිලේ ටිකට් එකලු-
( බැසිල්ට රිදෙන්න විසිල් කරාම සුසිල්ට තද වෙන බව විදේස කුමන්ත්‍රනකාරයෝ දැන්වත් දැන ගන්න ඕනෙ )
- සෝමවංස උන්නැහෙට ආරක්සක ලේකම්තුමා කෝල් එකක් දීල සද්දෙ දාලලු-
ලු ලු ලු.මේ වගේ "ලු" ආරංචි එනකොට පුලාගේ කනට ටැබූ ලොක්කා ගේ කටහඩ ඇහෙන්නා ඇහෙන්නා වගේ උනාලු.
- දත මැද ගනින් රාලේ -
- දත මැද ගනින් රාලේ -
වහාම වැසිකිලියට වැදිල හොදට දෙතුන් පාරක් දත් මැදගත්ත පුලස්ති එලියට ආවෙ අනේ මම නං මුකුත් කලේ නැහැ මම සපෝට් කලේ අසෝක සුරවීර මහත්තයගේ පොල් ගෙඩියට වගේ මානසිකත්වයකින් හරිම සැහැල්ලුවෙන්.

ඒ උනාට කොච්චර දත් මැද්දත් කට කහන ගතියක් දැනෙන හින්ද මේ ටික විතරක් (රහසින්)කියන්නම්.
මහරජතුමා චන්දෙ හදිස්සියෙ කෝල් කලේ මුදාගත්ත ප්‍රදේස වල අයගෙ ජනමතේ දැනගන්නලුනෙ.හරිම උතුම් චේතනාවක් නෙව තිබිල තියෙන්නෙ.
හැබැයි උතුරෙ බුවාල රජතුමානන් වහන්සේ තමන් වෙනුවෙන්ම හදිසියේ මහ වියදමක් කරල කෝල් කරපු චන්දෙ තඹ සතේකට ගනන් අරගෙන නැහැ වගේ නෙව පේන්නෙ.
බාගෙට බාගයක් උදවිය චන්දෙ දීල නැහැ.
දුන්න උදවිය කෙලින්ම වෝට් කොරල තියෙන්නෙ විපක්සෙට.
උතුරු නැගෙනහිර එක ආසනයක්වත් රජතුමා දිනල නැහැ.
උතුරෙ ජනමතේ දැනගන්න කොරපු මිසන් එක ටිකක් චාටර් වෙලා වගේ නේද?
උතුරු වසන්තෙ තාම උදා වුනේ නැද්ද මන්ද.
ක්‍රලලක් ක්‍රලලක් කට කට ක්‍රලලක් ක්‍රලලක් කට කට

රහස ඉවරයි.
මේ ටික දැන් මම ප්‍රසිද්දියේ හයියෙන් කියනවා.
තමන්ව කොටි ග්‍රහනයෙන් මුදාගත්තු වීරෝදාර නායකයාට කලගුන සලකන්න නොදන්නා උතුරේ ගුනමකුවන්ට සාපවේවා!සාපවේවා!සාපවේවා!

නාමල් මගෙ බබෝ - කලබල වෙන්න එපෝ!

ආදරනීය නාමල් බබා වෙත ලියමි

බබා ලන්ඩනයේදි එමිලි කාන්තන් එක්ක ගත්ත පින්තූරේ පබ්ලික් කොරන්න මංගල සමරවීරයි ජේවිපි බුවාලයි බුදු ගේමක් අරගෙන යන බව පුලාට ආරංචි උනා.බබාට මේ පොරවල් කොරන නොපනත්කම හින්ද ඇඩෙන්න එනවා කියල හිතෙන හින්දයි මේ ලියුම ලියන්නෙ ඔන්න.
නාමල් බබා හෙට රජවෙන යුවරජු විදිහට එමිලිකාන්ත්ව හම්බුන එක ගැන පුලාගෙ කිසි අප්සෙට් එකක් නැහැ.රජිනිකාන්ත් වගේ හැන්ඩ්සම් ලුක් එකක් නැති උනත් එමිලිකාන්ත් මාර අයිටම් එක කියල පින්තූරෙන්ම පේනවා.ලන්ඩන් වල හම්බෙලා පොඩි අඩියක් එමිලිකාන්ත් එක්ක ගහලා මොන දේ බබා කතාකලත් ඒකෙ කිසි වරදක් පුලා නම් දකින්නෙ නැහැ ඕන්න.තමන් කැමති පොරක් එක්ක ටෝක් එකක් දාල ආතල් එකක් ගත්තම තියන වැරැද්ද මොකක්ද?නේද?

ඒත් බබා එකට ෆොටෝ ගහන්න ගිය එක තමයි පොඩි කොස්සකට තියෙන්නෙ.
බබාගෙ අප්පච්චිත් බබා වගේම ඕනෙ එකෙක් එක්ක සෙට් වෙන මනුස්සයා.හැබැයි අප්පච්චි බබා වගේ පොටෝ ගහන්න යන්නෙ නැහැ.2005 කොටි බුවාලත් එක්ක පොඩි ඇයි හොදයියකට අප්පච්චිලා ට්‍රයි කලා කියල මංගල බුවා කිව්වට ඒව ඔප්පු කොරන්න පෲෆ් ඒ බුවාට නැත්තේ බබාගෙ අප්පච්චි මොන යකා එක්ක ටෝක් කලත් ඒවා ක්ලෝස්ඩ් ඩෝස් පස්සෙ පොටෝ නොගහ කොරපු හින්ද.

දැන් බබා බයවෙලා ඇති මේ වැඩේ පත්තු වුනොත් අප්පච්චිගෙ චන්ද වැඩේට කෙලවෙයි කියල.(අප්පච්චිට කෙලවුනොත් බබාටත් කෙලවෙනවා නෙව)
ඒ උනාට මේ තකහනියෙ පුලා මේ ලෙටර් එක ලියන්නෙ කලබොල වෙන්න කාරියක් නැති බව දන්නන්න.
ඔය පින්තූරේ කොපි සේරම අද බෙදල දුන්නත් ඕක ගැන මෙන්සන් පාරක් දැම්මෙ සිරසෙ උන්නැහෙලා ටික විතරයි.සුවර්නවාහිනියේ මධ්‍යස්ථ මීඩියා පොරවල් නිකමටවත් ඒ ගැන මෙන්සන් කොරේ නැහැ.අනිත් උන්දැලත් එහෙම තමයි.අප්පච්චිගෙ දන්සැල් වලින් කාල මේ මිඩියා පොරවල් කෙලෙහි ගුන හොදට තියනවා.එමිලිකාන්තන් ඉන්න පොටෝ එකක් නෙමෙයි ,බබා එමිලිකාන්තන්ගෙ කරට අතදාගෙන ඉන්න පොටෝ එකක් දීල සල්ලි ගෙවුවත් මේ මීඩියා පොරවල් නං කපේකට ඔය පින්තූරේ දාන්නෙ නැහැ.
ඕක වැඩිම වුනොත් ලංකා පත්තරේ රාවය ඉරුදින වගේ පත්තර පඩංගු කීපයක යයි.ඕව කවුරුත් වැඩිය බලන එකක් ඇයි.
උත්තරයක් දෙන්නම ඕනෙ වුනත් බබා දෙන්න උත්තරයක් තියනවා.
ලංකා පත්තරේ = ජේවීපි
ඉරුදින = යූඇන්පී
රාවය = කොටි / ඇන් ජී ඕ
රටට කෙලවන්න බලාගෙන ඉන්න සෝමවංස රනිල් සම්බන්ධන් හවුල ඩුප්ලිකේට් විදිහට පින්තූරයක් හදල කරන කුමන්ත්‍රනයක් මේක කියල වීරවංස වගේ ඩයල් එකක් ලව්වා ටිවි ප්‍රෝග්‍රෑම් දෙකක හොද සද්දෙට කිව්ව නම් වැඩේ නිකම්ම යට යයි.

නැත්තං මෙහෙමත් පුලුවන්.
එමිලිකාන්ත්ව බබා හම්බුනේ මහින්ද චින්තනය ගැන කියල දෙන්න කියල කියන්න.එමිලිකාන්තන් රටේ ඒකීය භාවය පිලිගන්න පොරොන්දු වුනා හරි මොකක් හරි කටට එන කෙහෙල්මලක් කියල දාන්න.කරුනව,පිල්ලෙයාන්ව,කේපීව දමනය කොරපු රාජපක්ස පවුලට එමිලිකාන්තන් පොරක්ද කියල සූරියප්පෙරුම වගේ කට හැකරයෙක් ලව්වා හතර පස් පාරක් කියවන්න.
ඊලගට එමිලිකාන්ත්ගේ සල්ලි ගත්තෙ රටේ සංවර්ධනේට කියල ඊලග ඇසිදිසි විද්යුත් මාධ්‍ය කතිකාවතේ ඔය කවුරු හරි ආර්ථික විද්‍යා බුවෙක් දාල කියවන්න.ගෝලීය ආර්ථිකේ කඩන් වැටෙද්දි ලංකාවේ 3 % ආර්ථික වර්ධන වේගේ රදවගත්තෙ ඔය සල්ලි වලට පින් සිද්ධ වෙන්න කියල කොලඹ විස්ස විජ්ජාලෙ ධම්ම දේශපාලනාචාර්ය තුමාගේ ලස්සන භාසාවෙන් දිවයිනට ලිපියක් ලියව ගන්න.
ඔන්න බබෝ ගොඩ යන විදි!
බබාගෙ නිල් බලකායෙන් මැරුනා කියන ආච්චි අම්මා ගෙදර ගහගෙන ඉන්නෙ බබාගෙ අප්පච්ච්ගෙ පින්තූරෙය ඒ මරල තියෙන්නෙ පුද්ගලික කෝන්තරේකටය කියල කිව්වම ඒකත් පිලිගන්න බුවාලා ඉන්න රටක් නෙව මේක.පත්තරේක වැටුන පස්සෙ පැහැදිලියෙන් රිජෙක්ට් කල නිකම්ම නිකම් පේපර් රිපෝට් එකක් බේස් එක කොරගෙන අන්තර්ජාතික අධිකරනයේ නඩුවක් පවරන්න යනව කියල කිව්වම ඒකත් රස කර කර ගිලින බුවාල ඉන්න රටක් නෙව මේක.
හිතට එන ඕනෙ මගුලක් දෙයියම්පා සහතික ඇත්ත වගේ ඇස් ලොකු කරගෙන.ගිරිය පුප්පගෙන කියල දාන්න පුලුවන් වීරවංස,සුරියප්පෙරුම වගේ හොද ගෝලයො සෙට් එකක් රජතුමාට උපදෙස් දෙන රටක්නෙ මේක.
ඒ වගේ ආසාවෙන් ටොපී ගිලින බුවාල ජීවත්වෙන,හොද රහට ටොපී ගිල්ලවන දස්සකමත් තියන බුවාල රජකම් කරන රටක මොනවද නාමල් බබෝ කරන්න බැරි?

ඒ හින්ද බබා බය වෙන්නෙ නැතිව ඉන්න.ඔය පින්තූරේ ගැන අඩ අඩා නොකා නොබී ඉන්නෙ නැතිව බුදුන්ට පහනක් පත්තු කරල හිතේ සැහැල්ලුවෙන් ටොයිලට් ගිහිල්ල නිදාගන්න යන්න.
බබාට තවත් උපදෙස් ඕනෙ නම් මේ පුලස්තිට වහාම කෝල් එකක් දෙන්න.
081 223 46 23

ඔබේ සේවයට ලැදි
- පුලස්ති අයියා

පුලස්තිගේ අති විශේෂ හෙලිදරවුව!

හිතාදර දෑ හිතකාමී බ්ලොග්කරුවෙනි,

පුලස්තිගේ මේ සූදානම රටට වින කොරන මහා දේශද්‍රෝහී පාවාදීමක් හෙලිකරන්න!ඒ හින්ද උඩට ගත්ත හුස්ම ආයෙ හෙලන්නෙ නැතිව මේකට හොදට සවන් දෙන්න.
ආන්ඩුවයි කොටි සංවිධානයේ ජාත්‍යන්තර අංසෙයි මහ බරපතල හවුලක් ඇතිකරගෙන තියෙනව කියල පුලස්ති වගකීමෙන් කියනවා.
මේ එකගතාවෙ ඇති වෙලා තියෙන්නෙ පහුගිය සති කීපය ඇතුලෙ.
පුලස්ති මේ නිගමනේට ආවෙ මේ කියන කාරනා උඩ.

1.කොටි සංවිධානෙට උදවු කලා කියල දෙමල ජාතිවාදය වැපිරුවා කියල ආන්ඩුව හිරේට අරගත්ත තිස්සනායගම් කියන කොටි හිතවාදී බෙදුම්වාදි මාධ්‍යකරුවා ආන්ඩුව නිදහස් කොරලා.කොටි මාධ්‍යකරුවන්ව එකපාරට නිදහස් කොරන්න ආන්ඩුව කටයුතු කොරන්නෙ මොකටෙයි?

2.යාපනේ ඇදිරි නීතිය අයින් කොරන්න දවස් කීපයකට උඩදි තීන්දු කොරල තියෙනවා.ජාතික ආරක්සාවට කෙලවෙන මේ වගේ පියවර ආන්ඩුව ගන්නෙ මොකටෙයි?

3.අධි ආරක්ෂිත කලාප වල ආයෙ මිනිස්සු පදිංචි ‍කොරන්න ආන්ඩුව කටයුතු කොරනව කියල පහුගිය දවස් වල ඉංගිරිසි පත්තර වල දාල තිබුන කියල පුලාට ආරංචි උනා.මේ වගේ කොටි සංවිධානෙට ආයෙ හිස ඔසවන්න ඉඩ දෙන වැඩ ආන්ඩුව කොරන්නෙ බම්බුවටද?

4.ඉංගිරිසි පත්තර වල චෝදනා නැති කොටි සැකකරුවන් නිදහස් කරන්න යනව කියලත් ලියල තිබුනලු.චෝදනා නැති උනාට මුන් කොටි නෙව.හැම චෝදනාවම ඔප්පු කරන්න පුලුවන්ද?මේ අය ත්‍රස්තවාදෙ වැලැක්වීමේ පනත යටතේ ආරක්සක ලේකම්තුමාගෙ නියෝග උඩ රදවල තිබ්බෙ නිකම් ඇයි?තඹ සතේක වැඩක් නැති,ස්ත්‍රී දූසන කරපු,විනයක් නැති සරත් බොස්ව යුද්දෙ දිනන හමුදාපති කෙනෙක් බවට පත්කොරපු ඒ අති දක්ෂ ශ්‍රේෂ්ඨ ආරක්සක ලේකම් මැතිදා නිකම් මිනිස්සුන්ව හිරේට දානවද?ඒ අය කොටින්ට ගෑවුන අය.ඒ කොටි සැකකරුවන් නිදහස් කොරාම අම්මේ මාර විනාසයක් නෙව වෙන්නෙ.දැන් ගිහින් හංගල තියෙන ආයුද ගොඩ අරගෙන ආයෙ යුද්ද කරන්න පටන් ගනියි.

5.ඊපීඩිපි සංවිධානෙ එක්ක ජනාධිපති චන්දෙට රජතුමා එකගතාවෙකට ඇවිල්ල තියනවා.ඒ එකගතාවෙ ගැන ඒ සංවිධානෙන් කොරපු ප්‍රෙස් රිලීස් එක තාම කවුරුත් රිජෙක්ට් කොරල නැහැ.ඒකෙන් උතුරු නැගෙනහිර දෙමල නිජබිම කියල පිලිගන්නවා,ස්වයංපාලන කලාපයක් දෙනවා කියල සදහන් කොරල තියෙනවා.
ඊයෙ සිරසට ආපු දත් දොස්තර පරාජිත තමන් 13 + පිලිගන්න බව කිව්වා ප්‍රසිද්ධියේ.13 වෙනි සංශෝධනෙන් එහාට ගියාම රට ඒකීය නෙමෙයි.ෆෙඩරල්.
සංඥාව ෆෙඩරල් මොකද කියන්නෙ ජෙනරල් කියල අහපු කසාපබ්බත කොල්ලෝ ලාල්කාන්තගෙ කොන්ද ගැන අහන්න ඉස්සෙල්ලා ඔය කොල්ලගෙ කොන්ද පෙන්නන්න දැන් ලියමුකො ලිපියක් 'සංඥාව සන්ධීය මොකෝ කියන්නේ මහින්දය!' කියල.

මේ කරුනු දිහා බැලුවම මහා කුමන්ත්‍රනේක ඉව පුලාට දැනෙනවා.විපක්සෙ ඔය කාරනා ( කොටි සැකකරුවන්ගෙ පුරස්නෙ,අධි ආරක්සිත කලාපෙ පුරස්නෙ.තිස්සනායගම් උන්නැහෙගෙ පුරස්නෙ) ගැන කතා කරද්දි ඒක කොටි කුමන්ත්‍රනයක් කියලනෙ කිව්වෙ.දැන් කුමන්ත්‍රනේ කොන්ත්‍රාත් එක විපක්සෙන් ආන්ඩු පක්සෙට බාර දිලා.
(සමහර විට ඒක කොලේ කේපී බුවා වෙන්න ඇති).
කැලේ ගහක් නහන්න අධිරාජ්‍යවාදීන් ක්‍රිස්තියානි යටත්විජිතවාදීන් යුදෙව් ග්‍රීක මූලධර්මවාදීන් යොදාගන්නෙ කැලේ ගහක්මලුනෙ.දැන් ආන්ඩුවේ ජය නහන්න ආන්ඩුවම යොදාගන්න බෙදුම්වාදී කොටි කුමන්ත්‍රනකාරයෝ වැඩ කරනවා.

රටට ජාතියට බොක්කෙන්ම ආදරේ හින්ද ඔන්න කුමන්ත්‍රනේ පුලා හෙලිකලා.
මේ කුමන්ත්‍රනේ බයානකයි.(දැනටමත් පුලස්තිගෙ ඇගේ මවිල් කෙලින් වෙලා )
රනවිරුවන් හෙන ගේමක් දීලා දිනාගත්ත රට පාවලා දෙන්නයි යන්නෙ!
කසාපබ්බත කොල්ලෝ මල කෙලියයි.නිලන්ත බොස් එක්කම නැගිටිනු!
රට ජාතිය බේරාගමු!
මිගාර දොස්තර මහත්තයෝ ‍ලෙඩ්ඩු සෙට් එකත් එක්කම අවදි වනු!
කුමන්ත්‍රනේ පරදවමු!
සිංහල රටට මෙහෙම කෙලවන හැටි තවත් නං බලාගෙන ඉන්ඩ පුලුවන්ද හැබෑටම!

- මීට
දේශප්‍රේමී,
සිංහල,
බෞද්ධ,
පුලස්ති

මහා ආයුද හොරකම - ආන්ඩුවේ කැම්පෙන් එකට කෙලවන තුරුම්පුව

ෆොන්සේකා බොස්ගෙ ආයුද හොරකමක් ගැන ආන්ඩුව බෙරිහන් දෙන බෙරිහන් දිවිල්ල ආන්ඩුවට වාසිය කියල සමහර බුවාල හිතුවට පුලස්තිගෙ අයිඩියා එක නං ඕක ආන්ඩුවට පට්ට අවාසියි.

සරත් ෆොන්සේකා උන්නැහෙට සිවිල් දේශපාලකයෙක්ගේ ලක්ෂන නැතෝ කියල උන්නැහෙ ආපු ගමන් කටිටිය බෙරිහන් දෙන්න පටන් ගත්තා.
උන්නැහෙට දේසපාලන පලපුරුද්දක් නැතෝ කියල ඔන්න ආයෙත් කැ කොස්සන් ගහන්න පටන් ගත්තා.
පුලස්තිට තේරෙන විදිහට ආන්ඩුවේ කැම්පේන් එක සම්පූර්නයෙන් බේස් වෙලා තිබුනෙ ඔය පලපුරුද්දෙ කතාව මත.

හැබැයි අවාසනාවකට.එච් ටී ටී පී.( තිත් දෙකයි.ඉරි දෙකයි ) සොරි ඩොට් කොම්!
දැන් නම් ආන්ඩුව නාගෙන තියෙනවා.
පුලා හිතන්නෙ ආන්ඩුවට ඉන්නෙ ගොං උපදේසක සෙට් එකක්.මහරජතුමාට මහ මෝඩ උපදෙස් නෙව දෙන්නෙ.
දැන් හැමෝම කෑ ගහන්න පටන් ගෙන ඔන්න සරත් ෆොන්සේකා බොස් ආයුද හොරකම් කලා කියලා.
ෆොන්සේකා ලොක්කා හොරකම් කලා කියන වාරයක් වාරයක් ගානේ වදින්නෙ ෆොන්සේකා බොස්ට නෙමේ ආන්ඩුවේ කැම්පේන් එකේ පදනමට කියල මේ උපදේසක බුවාලට තේරෙන්නෙ නැද්ද හැබෑටම.

අවුරුදු ගනන් දේසපාලනේ තෙම්පරාදු වෙලා අපේ මන්ත්‍රී බුවාලා හොදම පලපුරුද්ද අරන් තියෙන්නෙ මොකටෙයි?
අහු නොවී හොරකම් කරන්න මිස වෙන මොකටද.
මාවිල්ආරු වන්දි ටිකේ ඉදල රොහිත අබේගුනවර්ධන සෑර්ගේ වත්කම් ප්‍රකාසනේ වෙනකම් බාල විදිහට ගෙනාපු ඉන්දියන් බෙහෙත් කුප්පිවල ඉදල කොන්ත්‍රාත් පිටට දීල පාලම් හදපු එක වෙනකම් - අනේ අම්මේ කොයි තරම් නං ලිස්ට් එකක්ද?ඕවා ගැන කියනව විතරයි නෙව.එක හොරකමක්වත් ඔප්පු උනේ නැහැනෙ.
දැන් බලන්නකො ආන්ඩුවම කියන හැටියට ෆොන්සේකා බොස්!
රෝහිත අබේගුන බොස්ලා කැලේ.
ලෝකේ හොදම ආරක්ෂක ලේකම්,ලෝකෙ කාර්යක්සමම ජනාධිපති - මේ හැමෝගෙම කනට විදල ආරක්සක ලේකම් සබාපතිකම් කොරන ලොජිස්ටික් එකත් ගොනාට අන්දල 2005 ඉදල අවුරුදු 3ක්ම මාර ගේමක්නෙ දීල තියෙන්නෙ!
අවුරුදු තුන හමාරක් කොරපු හොරකම ගැන දැනුයි යම්තම් ආන්ඩුවෙ ඇත්තොන්ට ඉගියක්වත් දැනිල තියෙන්නෙ.ඒ ඇවිල්ලත් ඒක උසාවියේ ඔප්පු කරන්න බෑ.ඒකනෙ උසාවි නොයා ටීවි ගානේ විවාද කර කර රස්තියාදු වෙන්නෙ.
කොච්චර සූර හොරකමක්ද?
දේසපාලකයෙක් වෙන්න මීට වඩා හොද සුදුසුකමක් තවත් මොකටෙයි ඉතින්?
සිවිල් දේසපාලකයෙක් වෙන්න ෆොන්සේකාට සුදුසුකම් නැහැ පලපුරුද්ද නැහැ කියල ආයි ඇමති කෙනෙක් කටක් ඇරල කියන්නෙ කොහොමද කිව්ව නං දැන්?
මේකෙන් වෙන්නෙ ආන්ඩුවේ කැම්පේන් එකටම වදින එක නේද?

ඊලග මෝඩ කතාව තවත් උන්නැහෙ කෙනෙක් කියපි.
රටට හිනා මූන දාගෙන හිටියට බිත්තර ආප්ප 40ක් කන්න ගෙනාවම ෆොන්සේකා බොස් ඒකෙන් 39ක් සේවකයගේ මූනට ගහනවලු.
මේවා කිව්වම අවාසිය ආන්ඩුවටමයි කියල පුලා හිතන්නෙ.
රජතුමා හිනා මූන දාගෙන කරන වැඩ බලමු.
තමන්ගෙ ගෝල බාලයො ලව්වා ලීෆ්ලට් බෙදන උන්ට කෙලිනවා.
පෝද්දල ජයන්ත බොස්ගෙ කකුල් දෙකට කෙලිය.
ලසන්ත බොස්ව සෙත්තපෝච්චි කලා.
කීත් නොයාර් උන්නැහෙට රට යන්න වැඩ සැලැස්සුවා.
බලාගෙන ගියාම මේ වගේ අපත වැඩ කොරන්න රජතුමාට තියෙන පලපුරුද්ද ෆොන්සේකා බොස්ටත් හොදට තියෙනව නෙව.
රජතුමා වගේ අනුන් ලව්වා නෙමේ ගහන්න ඕනෙ බිත්තර ආප්පෙ තමන්ම මූනට කෙලල අරිනව.
නිර්භීත දේසපාලකයෙක්ගේ ලක්සනයක්!

ඒ හින්ද පුලාගේ නිගමනය-
ආන්ඩුවේම ප්‍රචාර අනුව ෆොන්සේකාට සිවිල් දේශපාලකයෙක් වීමේ සුදුසුකම් හා පලපුරුද්ද නැහැ කියන අදහස බිද වැටී තිබේ.
රජතුමා තරම්ම දේසපාලකයන්ට අවශ්‍ය කොරන ගුනාංග වලින් ෆොන්සේකා බොස් සපිරිය.
දේසපාලන පලපුරුද්ද නැහැ කියල හිතල ෆොන්සේකා ට චන්දෙ දෙන්නෙ නැහැ කියල හිතාගෙන උන්න කොල්ලෙනි - පෝලිම් ගහල චන්දෙ දීපල්ලා.
මෙන්න නියම පලපුරුදු දේසපාලක නායකයෙක්!

පබා බබා මන්ද නොබා - වගේ නොවුනෙ අබා?

ෆොන්සේකා බොස්ට සහය පල කරපු හින්ද පබා එකේ පබාට කෙලවෙන්නලු යන්නෙ.පබා එකෙන් පබා ව ඩිසපියර් කරල වෙන බබා කෙනෙක් දාන්න යනව කියල පුලාට ආරංචි උනා.පබා එකේ පබා නැති උනාම ඒක තවදුරටත් පබා එකක් වේවිද?මේ ගැන හිත හිත ඉන්නව මිස පුලස්තිගේ වයිෆ් මේ ටිකේ හරියට උයන්නෙවත් නැහැ.
පබා ඇඹරි ඇඹරි හෝමාගම ස්ටේජ් එකේදි සරත් බොස්ට තොදොල් බසින් සහය පල කලාට පස්සෙයි මේ ඇබැද්දිය වෙලා තියෙන්නෙ.
පබා වගේ ලද බොලද සුකොමල සියුමැලි තරුනියක් සරත් බොස්ට සපෝට් කරනව කීවම රජතුමාගේ ගෝල බාලයෝ මේ තරම් කලබල වෙලා තියෙන්නෙ ඇයි?
පබා වගේ කෙනෙක් වෙනුවට සිරා කලාකාරයෙක් අනිත් පැත්තට කතා කලොත් එහෙනම් කොහොම කලබොල වෙයිද?

විරුද්ධ පැත්තට කිසිම කලාකාරයෙක් නැහැ කියල ජනාධිපති උන්නාන්සේගේ කලාකාර පෙරහැරේ නිලමේ කෙනෙක් වන සෝමරත්න දිසා ලොක්කා ටික දවසකට උඩදි චැලෙන්ජ් කලා.දැන් ඒ විදිහට විරුද්ධ පක්සෙ වෙනුවෙන් ඉදිරිපත් උන කෙනාටත් කෙලල ඇරල.
තමන් එක්ක නැති අනෙත් කලාකාරයෝ ලපයි සිපයි කියල උන්නැහෙම 2005 දි කිව්ව පුලාට මතකයි.
මහින්දට බටර් ගෑම = සංවේදීකම
මහින්දට බටර් නොගෑම = ලපයි සිපයි වීම.
සොම්මරේගෙ මේ සූත්තරේ පුංචි සුරංගනාවි චිත්තරපටිය බලල හිනා වෙන පුංචි පැංචියන්ට හොදයි.

පුලා අහන පුරස්නෙ තමයි චන්දෙවත් හරියට තියෙනවද කියල ෂුවර් නැති පමුදි කරුනාරත්න ලදැරියට රජතුමාට බටර් ගාන්න පුලුවන් නං පබා බබාට සරත් බොස්ට බටර් ගාන්න බැරි මොකද කියන එක.
මේ ටිකේ විරුද්ධ පක්ස කාර්යාලවලට එලව එලව ගහනව.මේවගේ නිව්ස් අයිටම් දෙක තුනක්වත් අනිවාර්යෙන් ටිවි එකේ යනවා.
රැස්වීම් තියන්න දුන්න ලැයිසොන් කැන්සල් කරනවා.
රජයේ ටිවි වල සංවාදෙකට බෙහෙතකටවත් විරුද්ද පක්සෙ පොරකට ආරාදනා නැහැ.
කැලනිය ආසනේ ලීෆ්ලට් එකක් බෙදන්නවත් විරුද්ද පක්සෙකට ඉඩක් නැහැ.
අපේ රජ්ජුරුවො ඇත්තටම විරුද්ධ අදහස් වලට ඔය තරම් බය මොකද?
අබා එකේ අධිපති තැන්පත් ඇන්තනි ගරු තැන ජනමූල නායකයද මොකක්ද එකක් කීවෙ මේ වගේ කෙල්ලන්ටත් බය වෙන පොරකටද?
රජ්ජුරුවො ෂුවර් ෂොට් දිනනව නං - ජනතාව කෙලෙහි ගුන සලකයි කියල ෂුවර්ම නං - සරම කැහැපොට ගහගෙන ඔච්චර නටන්නෙ මොකටද?
භූමිතෙල් ගාපු ගැරඩි වගේ ගෝල බාලයෝ මෙච්චර නලියන්නෙ මොකටද?
පුලාට නම් මේව දකිද්දි මතක් වෙන්නෙ මරනය පෙනි පෙනී වියරු වැටිල දගලන සතෙක්ව.
සාධාරන ශ්‍රි ලංකා කාරයොන්ට මේ වගේ වනචර වැඩ අනුමත කරන්න පුලුවන්ද?

පහුගිය ටිකේ බ්ලොග් සටහනක් නොදැමීමට හේතුව

ඊයෙ පෙරේද බ්ලොග් කෑල්ලක් අටෝගෙන වැඩට බැහැපු මුල්ගම්පොල පුලා අයියා වෙනුවෙන්ම ප්‍රවීන බ්ලොග්කරු සහ දේශප්‍රේමය පිලිබද විශේෂඥ වෛද්‍ය (MBBS)මිගාර දොස්තර බොස් වෙනම බ්ලොග් සටහනක් දැම්ම කියන ආරංචිය පැතිර ගියා විතරයි මුල්ගම්පොල ගමම ආනන්දයෙන් ඇලලී ගියා.
පුලාට මේ ආරංචිය ඉස් ඉස්සෙල්ලාම කිව්වෙ කොන්ඩෙ කප කපා ඉන්දැද්දි කොන්ඩෙ කපන තැනට ආපු බාබර් අබ්දුල්ලා.
"ඔබතුමා අපේ ගමට ආඩම්බරයක්!"මාව බදාගෙන අබ්දුල්ලා ලොකු හාදුවක් දුන්නා.
"ඒ වගේ ප්‍රසිද්ධ රටට දැයට සමයට වැඩ කොරපු මහත්තැන් කෙනෙක් පුලා ගැන කතා කරනව කියන්නෙ පුලත් හෙන ඩයල් එක වෙන්න ඇතිනේ?"ත්‍රී විල් පාක් එකේ පැචා මල්ලි කිව්වා.
පුලා පදිංචි ගෙදර පාරට හැරෙන තැන ගනිත කොටාගෙ සෙට් එක ලොකු තොරනක් ගැහුවා.
"ගමට කීර්තිය ගෙනා පුලා අයියා පිලිගනිමු!"
ඒකෙ ලොකුවට කොටල තිබුනා.
පහුගිය සුමානෙම ගමේ අයගෙ උපහාර උත්සව වලට යන්න උන හින්ද පුලාට බ්ලොග් ලියන්න ඉස්පාසුවක් තිබුනෙම නැහැ.පහුගිය සුමානෙ මොකුත් ලියවුන් නැත්තෙ ඒකයි ඔන්න.

දැන් මේක කියවන හැමෝටම පොඩි රහසක් කියන්නයි පුලාගේ සූදානම.
මිගාර බොස්ගෙ ලිපියට කමෙන්ට් දැම්ම අයිය කෙනෙක් ටැබූයි බියොන්ඩ් ෆ්‍රේම් ගැනයි කතාකරද්දි තියන වෛරි ස්වරූපයද මොකක්ද එක පුලා ගැන ලියද්දි නැත්තෙ ඇයි කියල ඒකෙ අහල තිබුනා.ඒකට මිගාර බොස් නැහැ එහෙම විසේසයක් නැහැ කියල උත්තර දීල තිබුනා.උන්නැහේ උගත්කම වැඩි වෙන්න වැඩි වෙන්න වී කරලක් වගේ නැමෙන හින්ද හරි නිහතමානී හින්ද ඇත්ත හේතුව කිව්වෙ නැහැ.ඒත් ඔන්න ඔහෙ පුලා ගැන මිගාර බොස් වෛරී නොවෙන්න හේතුව (මිගාරට ගෞරවයක් විදිහට) කියල දාන්නං කියල පුලා හිතුව.

පුලා එක්ක මිගාර බොස් තරහ නොගන්නෙ අපි ඩබල අතර තියෙන සමානකම් දෙකක් හින්ද.
1.පුලා වගේම මිගාරත් හොදට බොන්න කැමතියි.
පොඩි වෙනසකට තියෙන්නෙ පුලා නිකම් නෝමල් කසියා ගහද්දි මිගාර ගහන්නෙ නියම දේශප්‍රේමී ගල්.ඒව සාමාන්‍ය කඩවල නැති ඇහැට පේන්නැති ජාතියක්.
දේශප්‍රේමි ගල් භාගයක් ගැහුවම වටේ සේරම පේන්නේ රුවිතෙට.
හොරුන්ගෙත් හොරු පවා කම්බා හොරු විදිහට ගරු කරන කම්බා ++ වර්ගයේ හොරුන්ව දේශප්‍රෙමි ගල් ගැහුවම පේන්නෙ දේසප්‍රේමියො විදිහට.මිනිස්සු කන්න නැතිව දුක් විදිද්දි මාසෙට ලක්සෙ ගානෙ ගෙවල් කුලී ගන්න නාස්තිකාරයෝ රොත්ත පේන්නෙ ජාතිහිතෛශී ඇමති මන්ඩලයක් විදිහට.වෘත්තිය සමිතිකාරයෝ පේන්නෙ කොටි විදිහට.වෙන අදහසක් ගේන බ්ලොග්කාරයෝ පේන්නේ ඉවත් කල යුතු කිනිතුල්ලො විදිහට.

2.පුලා වගේම මිගාර බොසුත් වැල සයිට් වල තහනම ඉවත් කරනවට පක්සයි.
ලගදි රෝසවත්තෙ තියන්න හිතාගෙන ඉන්න පශ්චාත් වැලවාදීන්ගේ මහා සම්මේලනේ සමාරම්භක දේසනේ දෙන්න ඉන්නේ මිගාර බොස්ට කියල කනින් කොනින් පුලාට ආරංචි උනා.
වැල බැලීමේ අයිතිය වෙනුවෙන් පුලා එක්ක එක මතේ නොසැලී,එකාවන්ව,එක්සිත්ව ඉන්න මිගාර දොස්තර බොස් පුලාට ටැබූට වගේ කුනුහබ්බෙන් බනින්නෙ මොන හිතකින්ද?

එන්න මිගා එන්න මිගා නැගිටලා
මෙන්න මිගා මෙන්න මිගා රසකතා
ගල් භාගෙ අරන් එන්න
රටට සෙත් පතා ගහන්න
එන්න මිගා එන්න මිගා නැගිටලා

කතිරය ගසා කලගුන සලකමුද? අඩියක් ගසා අපි කරපු කතා බහේ වාර්තාව

වාර්තා කරන්නේ - පුලස්ති ගෙඩිගේ ( මුල්ගම්පොල අච්චාරුවත්තේ සිට)

"තිස් අවුරුදු ශාපයෙන් රට නිදහස් කරගත්තෙ අපේ ජනාධිපතිතුමා.ඒ හින්ද එතුමට චන්දෙ දෙන්න"
තිස් එක් වෙනිද රෑ පොඩි තිතට මත පාටියකට සෙට් උන වෙලාවෙ පරුමුඛයා කිව්වා.
"නිදහස් කරගත්තෙ එයා විතරද?" අනුරාධ මල්ලි ඇහුවා.
"නායකත්වය දුන්නෙ එයා"පරුමුඛයා මේසෙට පහරක් ගහල ගිගිරුවා.
"යුද බිමට ගිහින් ගේම දුන්නෙ කවුද?"
"ඕඩර් එක දුන් නැත්තං යුද බිමට යන්න පුලුවන්ද?"
"ඕඩර් එක දුන්නට යුද බිමට ගිහින් වැඩේ නොකලනං යුද්දෙ දිනනවද?"
"ප්‍රේමදාසට ජේආර්ට චන්ද්‍රිකාට කොරන්න බැරි උන එක ජනාධිපතිතුමානෙ කලේ"
"ප්‍රේමදාස ඕඩර් දුන්න.ජේආර් ඕඩර් දුන්න.ඒ එකෙක්ගෙවත් ඕඩර් හරියට කරන්න කවුරුත් හිටියෙ නැහැ.මහින්දත් ඕඩරේ දුන්න.මේ පාර ඕඩරේ හරියට කරන්න පොරක් හිටියා.එතකොට කවුද වීරයා?"
"තමුසෙලගෙ විවාදෙ ගොං විවාදයක්නෙ" ගල් භාගයක් අතේ තියාගෙන හිටපු ගනිත කොටා කිව්වා.
"කුකුලද බිත්තරෙද ඉස්සෙල්ල ආවෙ වගේ ගොං කතා කියවන්නැතිව නිදහසේ අඩියක් ගහන්න තියන අයිතිය ගැන කතා කරමුකො.ඒක පිලිගන්නෙ රජාද?ජෙනරල්ද?"

"ඒ උනාට මේක හෙන අසාධාරනයි"ටික වෙලාවකට පස්සෙ පරුමුඛයා ආයෙත් කිව්ව.
"මක්කෙයි අසාධාරන?"ගනිත කොටා ඇහුවා.
"රට බේරගත්ත එකට කලගුන සලකන්න හරි ජනාධිපති දිනවන්න ඕනෙ"
"පිස්සු එකයි"පුලාට කියවුනා.
"කලගුන සලකන්න චන්දෙ දිදී ඉන්න ගියා නං 48 ඉදලම රටේ බලයේ ඉන්නෙ යූඑන්පිය.ඇයි නිදහස අරන් දුන්නට ඩීඑස් ලොක්කගෙ පක්සෙට කලගුන සලකන්න එපැයි"
"කලගුන සලකන්න ඕනෙ නං ජනාධිපතිගෙ ලොකු පිලිමයක් හදමු!"මුරා බාස් කිව්වා.
"ඒකට අවුරුදු පතා ලොකු මල්මාලයක් දාමු!"මල් අයිස් ගංජ වලින් කලු උන දත් දෙපල පෙන්නලා හිනා උනා.
ෆොන්සේකා බොස්ගෙ දත් කලුවෙලා තියෙන්නෙ ගංජ ගහල කියල මහින්ද අබේසුන්දරයානන් වදාල දවසෙ ඉදල මල් අයිස් බොක්කෙන්ම සරත් බොස්ට සපෝට් එක.
"කලගුන සලකන වැඩේ ඒ විදිහට කොරල මේ වෙලාවෙ හොදම පොලිසි එක ෆෝවඩ් කරන බුවාට චන්දෙ දෙමු.
චන්ද එන්නෙ ඉස්සරහට කරන දේවල් කරන්න මිනිස්සු බලයට පත්කොරන්න මිස කලගුන සලක සලකා ඉන්න නෙවෙයි නෙව"පුලා බෝතල් පාටියේ පොලිටිකල් චැප්ටර් එක ක්ලෝස් කලා.

"දන්නවද මචං වැඩක්?"මුරා බාස් ඊලග චැප්ටර් එකට මුල පිරුවා.

ඇඩල්ට්ස් ඔන්ලි කන්ටෙන්ට් වලට බ්ලොග් සංගමේ ඉඩ නොදෙන හින්ද පාටි කොන්වර්සේෂන් එකේ ඊලග චැප්ටර් එක ලියන්න බැරි වීම ගැන පාඨකයනි!මට සමාවුව මැනවි!

කොහොම හරි ඒකෙන් මේකෙන් අර ෆොන්සේකා බොස්ගෙ ටීවි ඩිබේට් චැලෙන්ජ් එකට රජතුමා එන් නැති එක හොදයි කියල පුලස්තිට හිතෙනව.ඒ ආවත් චැම්පියන් උඹද?මමද? කියල ඩබල මරා ගනියි.ඉස්සරහට වෙන දේ ගැන ක්ලියර් වැඩපිලිවෙලක් ගැන ඩබලෙන් කවුරුත් කතා කරයිද කියල පුලාට නං ෂුවර් නැහැ.